lanmou kon sa ka ékri

lanmu kon sa ka ekri sé pa an bagay ou tann di.

Sé an foss ki pé  fè w pwan kouri lè ou santi y vini.

Sé vibrasion ka fè w janbé nenpot monn an dé sigond.

Sé saw i wè an dézyé mwen , mé sa fèy pè .

Lanmu vini chèché mwen adan "sèlté" mwen.

Lanmu vini chèchè w tou pandan ou mayé . 

Lanmu démaré mwen i chayé mwen adan an van "fonmifolaj".

Lanmu fè mwen pasé , pou an kalyè , san mwen janmen koké pésonn.

WI dépi ti-boionm i ka kouri dèyè nonm la ki andidan nou chak la.

Mé fok pa kwè ki enmen sé nenpot kisa , mwen jis ka mandé mwen poutji yo bay an non pas sé pa an bagay ki ni sans .

Non sa pa ni sans !

Sa pa ni sans , lè ka di ki ou enmen mwen é ki ou ka pati san kité tras .

Tristess valé mwen kon an ti woch an mitan an gwan lavalass.

Sa pa ni sans lè ou ka di mwen pa ba w lanmu , alos ki sa ka bat andidan mwen dépi jou a an wè w pasé lasavann an mitan an toufé yenyen.

Dé zié w  té ka briyé kon an flanm difé lespwa , tou dan w té déwo lè nou gadé ko nou.

Mwen santi tout ko mwen chanjé , lanmu flopé mwen , é sé pou sa ou ka  di ki mwen vini fou. 

mwen fou mé mwen pa jalou , sé tjè kontan w ka fè mwen vibré menm an dé bwa anlot.

Mé mwen pa fou pyès , 

Pa mandé mwen oublyé w , pa sé dan woch santiman mwen gravé .

Lè lapot la ouvè pa ni ayen ki sa fèy fenmen ,. 

Man éséyé mé mwen pé pa fè ko mwen di tò, pou fè kò mwen pasé pou an Mun ki swadizan fò.

Fè w pwan lavol an servel mwen,  mi sé sa ki ped tet, asirépapétet.

Mwen pé konpwann ou entjèt , pas ou sé lé lanmu taw selman.

Mé lanmu sé pa pou an sel mun, mé sé sa an ka ba w ki ta w sel .

Sa an ka viv épi w ki ta nou , nou tout la bizwen ti zin tala ka fèw nou dousi san ped konsians.

Ou mennen mwen douvan Bondyé w , sa sé pli bel bagay pou mwen .

Ou fè mwen fè chap an lannuit la , mwen janbé dlo pou sa .

Ou pé ni anlo mun ki pé kwézé chimen w , mé ni dé moun ki ka rété la ,gravé , non yo matjé kon lin lanmen w ... sa fout vré ....

Koulè lapo w , lodèw chivé w , dousè w tandress ou sé dé zel lanmu ka fè mwen volé wo , lè ou pati san fè bwi mwen rété atè kon vè tè , an ka fouyé twou pou rimen tou ti zin lanmu ki ni anlè latè.

#nzilapawol